Aleksandar Horvat: VREME DEŽĐA

307362447_6040339785982999_1284223289591332595_n

Čez male sive luknjice na oblakima precurel je dežđ. Po saki je v zemli vdrapleni brazdi potekel curek i poiskal svojega puta, a suhi i raspocani zemlin požerak od žeje ni mogel pogatati. Tak nam to zgledi čez zaprti oblok i ni dobro. Čez otprti oblok, još gorše.
Ali zemla i nebo su stari pajdaši. To kaj oni igraju, nas se ne dotikavle niti nas se pita. Nama vu zverinjaku itak nikaj ne paše, mi smo “nenapasani“. Točno smo v štoriji negda viška i v glavnem na zadevi. Nam je krivo vreme, navek “v krivo vreme“.
Ne vredi nam pesek, ne vredi nam blato,
Prečrna je melja, prebela črnina,
Premokra je voda, prezlatno je zlato,
Pretrdi je vanjkuš, premefka trnina.
Nigdar ni rečeno da bumo imeli pravicu na to da nam bu vse taman. Zato niti ne bu. Čez male sive luknjice bu curelo gda bu curelo, zemla bu pogatala gda bu pogatala, a nam v zverinjaku i dale ne bu praf, niti onda gda nam bu praf. Od takve smo krpe napravleni.
A z neba i dale stiha rominjaju odprešana lit, zmesni kruh, zlatni žiri i sivi biseri kaj se cediju po glajži.